搵臨時落腳點篇



  • 搵臨時落腳點篇
    其實我哋舊年有移英呢個念頭時已經馬上安排咗次全家總動員英國遊,Shortlist咗一啲地方去留幾日同埋搵朋友帶我哋四圍望下,當時因為未有BNO Visa其實我哋除咗生活外仲要考量一啲有關做生意嘅嘢,但隨住局勢同疫情嘅發展,我哋都認為行BNO Visa呢條路會相對有彈性啲,所以就擱置咗進行到一半嘅生意計劃,但我哋既然都下定決心要移民嚟英國,就喺BNO Visa正式出台前闔家去英國,希望可以喺2020年內安頓好一切去迎接2021年嘅開始。
    承上文,其實我哋都已經做過一輪資料搜集,亦都有實地考察過,我哋心目中都有個大概嘅共識會先去邊落腳,因為我哋唔想隔住個Mon買樓/上去聽啲專家吹一輪就買樓,所以我哋嘅計劃係先搵個暫時住嘅地方去實際睇下個社區(始終上次都係旅遊型式咁短留幾日),再搵租盤租半年至一年,再喺呢段時間入面搵真正心儀嘅安樂窩。
    跟住就係要搵咩類型嘅短期住所喇,其實都離不開酒店/Airbnb/Serviced Apartment:

    1. 酒店: 最平嘅選擇可以去到3-400蚊晚,睇相正正常常,但一睇Google 啲review就不得了,品流複雜又衛生程度唔理想,扶老攜幼嘅我哋好快就打消咗呢個念頭,如果去啲有品牌可接受嘅又要起碼800-1,000一晚,但又無得煮飯,嚟得想體驗下個社區其中最重要就係自己去買餸煮飯,所以好早我哋就剔除咗酒店呢個選項。
    2. Airbnb: 首先因為我哋人數問題,無乜可能一間Airbnb塞得晒,又想有個照應,但Airbnb真係好難搵到鄰近又啱我哋住嘅房/屋,佢嘅位置亦未必係我哋心目中覺得想視察嘅地點附近。另外原本諗住疫情打擊旅遊業啲Airbnb會平啲,但其實又唔係好平,係有啲租一個月會有折,但價錢上都唔係話好吸引。
    3. Serviced Apartment: 最後我哋就試下搵啲心儀地點附近有冇Serviced Apartment,相對上價錢應該係較貴但應該五臟俱全,可以一到埗就有間ready俾我哋住嘅apartment,好感恩亦都俾我哋搵到有同一Building內最後嘅2間Apartment with 2 bedrooms and 2 bathrooms available,經過周詳嘅考慮同討論(send條link出嚟問各人有冇異議,冇人有)結果就喺十個message內book咗。
      就係咁,我哋總算定咗落地後第一個目的地,知道有間Ready好嘅Apartment (雖然唔係長期租約)喺度等我哋個心亦都安定唔少。
      另外想提提大家租邊個選擇都好,記得記得記得問佢可否Early Check-in at 6/7/8AM,因為大家多數都係晨咁早到達英國,拖住咁多行李、拖住一家大細、拖住自己個疲乏身驅,真係好需要放低晒啲嘢沖個涼休息下先再出發,記住呢個只係你到達英國後嘅第一日、第一個星期、第一個月、第一年、Many more to come,唔好俾自己咁大壓力趕死線,搵到一個心儀令你可以住得安心嘅地方係好緊要,亦好難可以一蹴而就,或者中間會有挫折、失望、甚至失敗,但記住只要唔放棄企返起身再行過,同身邊人互相扶持、同路人互相勉勵,就算滿身傷痕,只要堅持一拐一拐咁行落去,我相信大家都可以到達心目中理想嘅終點。

    https://www.facebook.com/HumgagoUK/posts/108892320999309


Log in to reply