心理準備篇



  • 心理準備篇:
    「準備成點呀? 」「準備好未呀? 」「有冇咩要幫手呀? 」
    離開前同親戚、朋友、同事見面好多時都係用呢幾句做開場白,其實而家諗返轉頭好多嘢都係逼到埋身頂硬上,但又咁講,就算俾多一個星期甚至一個月,始終有啲事係要去到嗰刻先可以完成,你永遠唔會知嗰刻你係咪已經準備到最好,只有盡力去預備好自己嚟迎接之後嘅挑戰。
    既然決定咗要離開就只有抓住每一分每一秒去見想見嘅人、做想做嘅事、食想食嘅嘢,盡量唔好有遺憾,今次係我哋第一次未知歸期咁離開呢個土生土長嘅地方,一個我哋愛嘅地方,香港。
    嚟到英國,將要面對翻天覆地嘅改變,即使你可能曾經係公司嘅最佳員工,你可能管理緊一個幾十人嘅部門,一間幾百人嘅公司,當離開自己嘅Comfort Zone,去到一個新地方重新開始,你會發覺無論你之前(自覺)準備得幾好都好,都會有錯漏,事情亦未必可以好似以前咁順暢、咁如意,但失敗係我哋成長中最重要嘅學習階段,嚟到一個新環境要迅速咁累積經驗意味著將有機會面對好多失敗挫折,但既然已經踏出咗最重大嘅一步 - 離開香港,請放手去試去碰壁,優秀嘅香港人一定可以喺呢個大環境下鶴立雞群,寫出屬於我哋呢代,值得流傳落去嘅故事。
    建立家園,係我哋呢群人嘅首要目標,當你之前十幾二十年都係住喺同一個地方,你會發覺有好多需要取捨嘅嘢,帶唔走嘅嘢,只能夠留喺回憶嘅嘢,但記憶同意念係抹唔走,係呀,有啲嘢有啲人/黨好想我哋忘記,但我哋唔會忘記、唔敢忘記,仲會薪火相傳教我哋下一代我哋原本以為個個人都起碼會有嘅良知。
    人,無咗良知,你連寄生蟲都不如呀。

    https://www.facebook.com/groups/276966050413469/permalink/365312801578793/


Log in to reply