搵屋篇一章



  • 唔駛俾£350介紹費我,多謝。

    人生幾十年,突然之間無咗屋企,其實個感覺幾無奈又唏噓。

    見到老豆收埋幾支潤唇膏喺喼,想笑佢𢦀鳩時俾佢一語道破「唔帶喺身擺去邊? 我哋冇咗屋企咖喇…」要佢幾十歲人好似走難咁揹晒啲家檔(潤唇膏)上身,同我哋嚟到個新地方重新開始,感激佢嘅犧牲同支持,但其實啲潤唇膏可以跟船嚟……

    初嚟報到頭兩日,大人細路都仲調節緊時差,所以未有特別安排啲乜節目/行程,主要都係沿住apartment週邊熟悉下啲環境,行下超級巿場,長輩最有興趣就搵下邊度有平靚正嘅餸賣,亦真係俾佢哋搵到離apartment唔遠嘅地方有啲攤檔賣啲相對平啲同新鮮啲嘅生果蔬菜同肉,仲有識講廣東話嘅人擺檔。

    第二日抖足精神就開始send email試下約睇樓,最快覆第一間約到去睇嘅就係一個朋友介紹嘅一幢新落成全幢都係月租嘅apartment,其實都類似我哋而家住緊嘅serviced apartment,如果你租有傢俬嘅基本上都係拖喼就住得入去咁濟,直接聯絡間物業管理公司, Email講你有乜需要,我基本上都係list咗:

    人數(幾多個大人幾多個細路)
    有乜要求 e.g. 想搵點樣嘅Apartment (例如想要2間鄰近嘅二至三房Apartment, furnished apartment preferred etc.)
    都有提一提我哋個背景e.g. 初到英國,未有工作同住址證明
    英國睇樓初體驗

    約咗到埗嘅第三日就第一次睇樓,因為我哋未有車,UberX又只可以坐三人,加上疫情,所以三人小隊先去睇樓,我哋揀呢度係相對上比起住緊間serviced apartment個地區較寧靜嘅地區,都想睇下無咁熱鬧繁忙嘅地區啱唔啱我哋呢家人,當日一直都落住雨,所以街上都幾冷清,不過行喺街上個感覺都係呢度比較安心,整體個初步印象都唔錯。

    早十五分鐘到約好咗個職員嘅地方等,但佢應該有嘢忙緊,比約定時間遲咗大概十分鐘,即係我哋等咗差不多二十五分鐘,而等嘅地方都唔係啲好proper嘅大堂/Reception咁,無位坐,如果同行中有長輩要咁企喺度等都好辛苦,如果可以唔駛出動長輩去睇緊係最好,但始終我哋都好需要佢哋嘅經驗去幫眼睇間屋同做決定,所以呢段時間真係好辛苦兩位長輩喇。另外長輩都有提,之前喺香港都有買可摺疊揹上身嘅櫈仔,如果呢啲時候有拎嚟就大派用場喇。

    個職員終於出嚟(都有say sorry),就開始帶我哋去睇最大嘅三房單位,仲要喺頂層,呢度冇乜高樓大廈之下,咁望出去嘅境用香港角度真係好靚,所有傢俬、雪櫃、廚房同床都係全新,不過如果我哋想搬晒入嚟成八個人始終會好逼下,但呢個租金如果要再租多間就會好甘,所以我哋就問佢有冇啲兩房同一房睇下,諗住睇下2+2 / 2+1可唔可行。

    跟住佢就帶我哋落兩層睇相連嘅兩房,同同層仲有多間兩房同一房,裝修同啲傢俬廚房基本上都係一樣風格,只係啲房嘅數目唔同,我哋睇嘅一至三房個價錢就由一千五百幾磅至到二千五百幾磅,要租兩間嘅話其實乜組合都好,淨租金都要成四萬蚊一個月,如果鍾意住新樓同埋嚟到都想先住apartment,其實一個四人家庭喺度租兩房都係一個幾快捷嘅租樓辦法,因為佢唔係小業主亦無經地產代理,簡單嘅概念係你真接同間發展商嘅租務部傾,亦都問咗基本上你肯俾一年錢佢第二日就俾你拉喼入嚟住。

    睇樓過程都有問呢啲問題:

    – 如果係租呢度,我哋始終要租兩間同埋要一鳩過俾一年租,所以都有試下講價,不過佢都企得好硬無價講。

    – 有問過可否半年約,佢初初口頭話OK,但之後再問又好似落咗閘咁。

    – 除咗租金仲有乜收費,停車場又加一舊,水電上網council tax加埋又要預兩三舊,條數計下計下越嚟越甘。

    – 網上搵到有啲價錢好似平啲喎,但佢就話係低層啲(我哋即時話唔介意住低層),不過佢就話已經全部租晒出去,呢點都令我哋覺得佢有啲蠱惑,覺得佢只係想sell晒啲貴盤俾我哋。

    亦都有諗,啱啱嚟到,呢度係好新淨同快搞掂,但又無理由咁快決定,連House都未睇過,所以都只係話返去再考慮下,而佢亦都話會俾follow-up email我list 返清楚我睇過嘅單位同埋分別價錢,最弔詭係佢幾個鐘後俾Email我時(都做到成7點半),話頭先睇嘅其中一個單位已經租出咗喇,搞到好似好搶手想我哋好衝動去決定咁。

    睇完呢度之後我哋都有試下行下去啲地產舖,但發覺全部鎖晒門好似唔歡迎人咁,後尾知道原來因為疫情,佢哋一般都要人敲門然之後等入面啲人戴返好個口罩先招呼你入去,亦都因為已經臨近放工時間,呢日啲地產舖都無乜人想理我哋咁,最多都只係遞張卡片出嚟叫我哋email佢想搵乜樓,等佢再通知我哋。又落雨又大風亦無乜人騷我哋,所以第一日嘅睇樓之旅就咁完成返屋企再從長計議。

    睇樓團第二日預告:連睇三間!?有House有Apartment仲有Openrent直接同業主deal? 嚟到英國第四日就租到樓!?

    https://humgagouk.com/2020/10/23/homelookingch1/?fbclid=IwAR2RPFuOl4Ra2mKEnV_s2yf_vmueTjD_UU25F4nqxprbwURWiR7MtqFBVT0


Log in to reply