第一日收屋就要喺嗰度過夜篇



  • 第一日收屋就要喺嗰度過夜篇

    話說經過咗幾日打仗般嘅日子,終於可以靜靜地打篇update俾大家。

    大家如果想追蹤返我哋搵屋嘅過程(未update完只係打咗2篇),可以搵返搵屋篇一同二章,(應該)會陸續打返個詳細過程同大家分享返同地產/業主交涉嘅注意事項。

    搵屋篇一章: https://humgagouk.com/2020/10/23/homelookingch1/

    搵屋篇二章: https://humgagouk.com/2020/10/24/homelookingch2/

    想襯紀憶猶新先打低我哋第一日收屋嘅經過……

    呢間屋係經openrent租嘅,所以所有嘢都唔經地產經紀,直接同業主Deal,亦好感恩遇到呢位業主,佢教咗同幫咗我哋好多嘢,因為佢都係HongKonger嚟咖!間屋都係佢買咗啱啱新收樓再裝修好放租,所有嘢都好新淨,同埋大家同聲同氣佢好明白我哋難處同有乜concern,又教好多我哋要留意同小心嘅地方,所以基本上我哋嗰日係一睇就決定咗要租呢間屋。

    事緣約定收屋當日,亦係我哋其中四人要從serviced apartment離開嘅日子,因為未能夠安排到late check-out(本來有諗過留多幾日settle好間屋先住入去,但佢都話太爆安排唔到)所以我哋就唯有10點前要完全撤離間serviced apartment,而業主都好好,就我哋9點就帶鎖匙到間屋度等我哋,所以我就8點先走一轉去車2老連佢哋嘅行裝過新屋同業主會合,再走多轉車另外兩人嘅行李,最後裝滿行李但坐唔到人,佢哋都係要自己分開搭Uber去。

    去到新屋業主就交鎖匙俾我哋,然之後拎住Inventory & Schedule of Condition Form同我哋行一轉間屋,睇下啲燈、暖氣、熱水爐、水喉花灑、煙霧感應器同埋唔同門窗嘅鎖有冇問題,然之後就到廚房,呢度租屋就算unfurnished其實佢都會包廚房嘅電器,一般有雪櫃、洗衣機、洗碗碟機、焗爐、煮食爐(新式嘅多數都用電磁爐,所以如果會自己帶爐具嚟嘅都要留意下可唔可以在電磁爐用)同抽油煙機,最後佢就同我哋對返交收一刻電同煤氣嘅meter度數,最後大家簽返一式兩份嘅Inventory & Schedule of Condition Form咁就大致完成咗個交收程序,業主亦好好叫我哋隨時有問題可以Whatsapp搵佢,仲不斷send申請寬頻、水費、電費煤氣費嘅資料俾我哋,幫咗我哋好多,十萬分感激。

    好喇,屋就收咗,一間unfurnished house,要即晚入嚟住過夜,最緊要係乜?就係起碼要有張瞓到嘅床呀!

    有幾樣嘢我哋早幾日專登去IKEA買定再喺apartment度洗好晾乾拎過去,包括枕頭、枕頭套、被、被套同床單,至於床褥,我哋最後無喺IKEA買,一嚟一張£7X嘅單人床褥要£4X運費仲要唔肯定可以我哋指定嘅日子送到,亦無可能當日買走車幾張床褥去Apartment再抬去新屋,所以我哋就打道回府再搵辦法,先去搵下Amazon睇下有冇,但啱啱過咗Prime Day又未到Thanksgiving,其實唔平亦唔知好唔好,之後就走上Topcashback個網搵下Mattress有乜網賣,俾我哋搵到有個網叫Mattress Next Day,顧名思義,今日訂你聽日就會收到張床褥喇,仲有好多香港都聽過嘅品牌,可能Model無咁新但價錢絕對有驚喜,所以我哋就喺嗰度訂咗四張床褥,最後屋主都未走四張床褥已經到咗。

    Mattress Next Day 網址: https://www.mattressnextday.co.uk/

    Topcashback 仲有3%回贈: https://www.topcashback.co.uk/mattress-next-day/

    英國生活必備,如果未申請Topcashback歡迎用我嘅Referral Link去申請: https://www.topcashback.co.uk/ref/humgagouk

    另外我哋一家都對清潔要求幾高(潔癖+強逼症),所以其實之前住Serviced Apartment要用啲舊地毯,除咗吸塵又無乜清潔可以做到令我哋崩潰咗無限次,尤其是你有兩個精力旺盛四圍摸四圍趴地嘅細路,真係辛苦人哋個女/孩子的媽,怒吼無限次……

    所以今次去新屋就購入咗Carpets Cleaner去幫啲地毯先做個徹底深層唔假手於人嘅清潔先住入去,雖然業主已經話呢度係新換地毯,但見到呢度啲本地人著住鞋咁踩入地毯,根本無人可以相信,唯有靠自己洗一次先安心,揀呢部都係睇下啲功能同Review,除咗清潔仲可以乾返啲地毯,因為好多同類型都係齋用蒸氣消毒殺菌,但如果洗完濕立立又唔知幾時先乾,所以揀咗呢部。有Amazon Prime又係可以今日訂聽日就送去你地址,唔駛一早買定晒啲嘢抽嚟抽去,亦好感恩基本上所有訂咗嘅嘢都在早上已經送晒去新屋,唔駛喺度等收貨心掛掛。

    Carpets Cleaner網址: https://amzn.to/3ovmlGc

    仲有支醫院級嘅消毒噴霧,圍返港紙30幾蚊仲要made in UK,網址: https://amzn.to/3mEX8aE

    Unfurnished嘅屋有爐具但冇廚具,所以收完屋收完貨就出去High Street食Lunch同埋買一啲必需品,例如水煲、水杯、碗碟刀叉匙羹筷子、砧板、刀、煮食用嘅煲、Pan、鑊剷湯殼、焗盤、焗爐手套/夾、拖地要地拖、水桶、毛巾、抹手巾、垃圾膠袋、廁紙、廚房紙等等等等……其中一長老講得好啱,基本上我哋係入到超巿家品部嗰度乜7都要買咁劑。

    掃完貨都有個小插曲,話說呢日好好天,一路都風和日麗,然後就喺大家差不多買完嘢我諗住揸架車出嚟接佢哋唔駛行一大段路嘅過程中,忽然就風雲變色,刮起勁大風同埋落好大雨(後尾聽返有啲地方好似仲有冰雹),因為佢哋係喺high street啲店外等我,雖然帶咗買餸車(必備,不過可以嚟到先買),但一吹就吹反咗仲打爛晒啲杯(好彩最尾檢查係面頭兩隻,有啲刮花咗但不影響使用),佢哋話附近啲警察同清潔工人一見到都唔理風勢雨勢馬上走過嚟幫手,一個充滿愛嘅地區,一個有真正幫助巿民嘅警察嘅地方。

    就係咁,總算有驚無險咁返到新屋,大家就馬上分工合作開始清潔嘅工作,後生嘅就研究同抬住部機去地毯區域洗地毯(都幾重下同埋佢哋洗得好仔細好小心,真係逐吋咁洗),其他人就抹地清潔廚房同廳洗新買返嚟嘅嘢,完全無休息咁濟由早上7、8點踩到去晚上6、7點先揸車去我哋Apartment(未到我哋check-out日期同埋諗住細路唔好咁快帶佢哋去,盞搞搞震無幫襯)一齊食餐簡單便飯,終於有得坐下(其中一個失算嘅地方,就係無買定櫈/梳化送去新屋,真係坐都無L得坐,得個窗台),但佢哋食完飯仲要馬不停蹄再去超巿買多轉食物(仲幫埋我哋買同送過嚟我哋樓下),所以喺新屋預備工作上真係辛苦晒2老同2後生,真係做到無停手去到1點幾先終於可以落床挨下。

    一家八口,你以為我要瞻前顧後睇住長輩又要睇住細路,其實我哋先仲係好幸福被照顧嗰個,好似好不可能(原本諗住有機會瞓地毯)嘅任務,其實大家互相合作互補不足之下都有機會完成,所以香港人唔好放棄唔好氣餒,我哋呢年幾都係咁走過嚟,只要堅持就可以見到希望。

    #LOTR

    #BNOVISA

    #三代同堂

    #闔家去英國

    #HumgagoUK

    https://humgagouk.com/2020/11/02/1stnightinthehouse/


Log in to reply