生活轉變篇



  • 嚟咗英國一段時間,慢慢都開始習慣英國同香港生活嘅分別。

    如果你之前好有福氣,有太太、長輩、同埋工人幫手照顧好屋企同小朋友,基本上只需要放工返到去同屋企人小朋友食飯玩陣就瞓覺。

    一家四口嚟到英國後嘅日子係點過?

    朝頭早6 – 7 點: 起身(好可能係俾細路整醒,而家已經調節到9點幾醒,但轉咗冬令時間又變返8點幾醒……)

    7 – 8 點: 預備早餐,食早餐,洗碗抹枱

    8 – 12 點: 搵嘢同細路玩/做 (又未有學返,疫情唔想成日同佢哋出街更加唔想佢哋喺度電視放題,小朋友跟身帶過嚟嘅玩具又有限),同佢哋玩到咁上下又要整下生果叫佢哋食

    12 – 1 點: 預備午餐,食午餐,洗碗抹枱

    1 – 5 點: 搵嘢同細路玩/做,細嗰個可能中間會瞓下晏覺(都盡可能同佢戒咗,等佢夜晚早啲瞓)

    5點: 安排細路沖涼,預備晚餐

    6 – 7 點: 食晚餐,洗碗抹枱

    7 – 8 點半: 搵下啲一家人可以參予嘅主題活動做下,例如Game night、movie night、music night咁一齊玩下輕鬆下。

    8點半 – 9點: 同佢哋刷好牙上床收拾心情瞓覺

    10 – 12/1/2點: 希望佢哋瞓晒咁就終於有兩公婆自由時間,太太可以睇下Emily in Paris,而我……所以啲文點解出得咁慢

    如果嗰日唔出街同細路困獸鬥真係幾消磨人意志,兩兄妹如果搵到嘢自己兩個玩當然好,可以換嚟一絲安靜嘅時光,但太安靜又驚出事,唔知佢哋搞緊乜有冇危險,所以第一間apartment有2房時真係會有啲時候完全離開咗我哋視線走咗去房玩,但而家轉咗間一房apartment雖然細啲,不過基本上一眼睇晒,都安心好多。

    以上嘅時間表都未有列明清潔抹地吸塵倒垃圾換垃圾袋洗衫晾衫收衫,仲要有時要網上/派一個人/有人看細路的話就可以兩公婆出去買餸補給(不過呢個算娛樂嚟),所以我同太太成日都覺得好似全日無停過做嘢咁。另外我哋初嚟報到仲要不斷電話電郵約地產/業主/睇車,工作量其實好驚人。

    睇住太太由在香港時努力預備,放棄自己嘅事業成為全職媽媽策劃移民,向媽媽虛心學習點打理好屋企點買餸計劃一日三餐,嚟到英國後就開始佢每日無時無刻照顧我哋起居飲食嘅日子,買咗餸返嚟就要安排嚟緊幾日三餐嘅安排,仲要有個豬隊友成日見到想試/食/飲嘅嘢就買返嚟隊入雪櫃,買得太多又驚過期都食唔晒,太少又要成日心掛掛幾時要再買,啲消耗品又要計住幾時用完就再補充,睇見佢成日煮完都無乜心機食,求期食完又要洗碗,真係睇到都心痛,所以各位爸爸真係要分擔多啲責任,多啲幫手做家務,或者諗啲方法去幫輕家務呢個重擔。

    如果家庭情況許可的話真係應該爸爸媽媽都全力留家先照顧好安頓好屋企先,搵到屋、熟習咗環境、搵到學校俾小朋友、之後先搵工,嚟到陌生地方真係好需要一家人同心合力去解決好多事情,請唔好將重擔放晒喺某個人身上,多啲相向嘅溝通,如果唔係好快會有頂唔順爆煲嘅一日。

    另外基於時差,以下呢啲對於香港嚟嘅大家可能都有影響:

    睇波: 變咗中午至最夜8點開波,好似我之前有提及過咁,其實有太陽嗰時好多時都要湊細路,好多時Miss咗都唔知,同埋都仲係習慣咗半夜醒一醒時望下啲比數(鬼佬真係好鍾意半夜三更踢波系列)……

    香港股巿開巿: 夏令 – 2:30AM (早啲瞓好過啦); 冬令 – 1:30AM

    香港股巿收巿: 夏令 – 9AM; 冬令 – 8AM

    美國股巿開巿: 1:30PM (美國十一月頭轉冬令時間後應該變返2:30PM?)

    美國股巿收巿: 8PM (美國冬令後應該變返9PM?)

    #LOTR

    #BNOVISA

    #三代同堂

    #闔家去英國

    #HumgagoUK

    https://humgagouk.com/2020/10/27/生活轉變篇/


Log in to reply