LOTR全紀錄



  • 離開香港到達Heathrow嘅清晨,因為武漢肺炎嘅關係而家航空公司都唔會俾人一窩鋒咁衝落機,會廣播幾行幾行咁企起身攞行李再分批落機。

    我哋呢群集齊老中青再拖住2個細路行出街會俾狗咬違反限聚令嘅團隊,都唯有放低香港人一貫急促嘅腳步,點齊行李點齊人頭再逐個除低機上嘅防疫裝備同去埋廁所,去到Immigration條隊我哋都應該係全班機最尾嗰幾個,清晨嘅時間加上疫情,人手都必安排得咁充裕,所以其實我哋都排咗超過一個鐘,目測前面都有起碼6-7個家庭係申請LOTR。

    我哋一行八人其實係可以分做4+2+2嘅3個家庭,以下我都會綜合返我哋遇到嘅問題同大概嘅流程,希望幫到將會嚟嘅大家準備得好啲。

    埋到去俾Passport個職員,就主動提出我哋希望申請LOTR,跟住個職員就用幾凌厲嘅氣勢話唔係你想申請就會俾你,你知唔知你需要提交啲乜? (之前都有睇過啲前輩提醒,應該搵個友善啲嘅埋去,呢個職員其實之前都觀察到西西地面,但我哋點讓俾第個? 讓俾下個同再下個都係自己友。)其實由last day喺香港咁多嘢搞咁多嘢執仲要同啲親朋好友道別,機上又唔慌瞓得好,大大話話我哋可能成三十個鐘無瞓過,俾佢咁考一考就即刻要魯芬急轉彎背返有乜要求出嚟,同時拎咗我哋預準好嘅文件夾show俾佢睇其實我哋都準備好晒有乜需要,由出世紙至到畢業證書同工作證明去證明長期都居住喺香港,亦有銀行月結單去證明財政無問題,同埋有醫療保險嘅證明。

    之後個職員就收咗我哋啲文件,一路睇/檢查同對住個電腦,一路仲問咗我哋一啲其他問題如下:

    1. 邊度嚟呀你? 邊班機? 有冇boarding pass攞嚟睇下?

    2. 嚟緊會住喺邊?

    3. 如果同行嘅人入面有人之前申請過英國其他嘅Visa,我哋3個家庭入面3個(100%)都有被問及關於之前個Visa嘅嘢。

    其實我哋事後都覺得佢係想透過你嘅對答睇下你有冇蠱惑,最主要都係要真誠咁作出對答並表示你係希望長遠留喺英國。

    問答完一輪再逐個除罩對下樣,佢就收晒我哋啲passport同文件話去影印,跟住就叫我哋去咗側邊一排櫈仔度坐低等佢返嚟叫名。

    前面申請LOTR嘅家庭都走晒,香港人就得返我哋幾個坐喺度等消息,慢慢都逐個嚟叫我哋逐個去放行,反而我哋一家(可能有大有細,另外準備啲文件又最厚)最尾先返到嚟叫我哋起身,佢會帶返我哋去個counter度俾返文件我哋再同我哋一齊行送我哋離開immigration嗰部份,其實傾傾下計個職員都nice咗好多,仲話我哋同佢住得近遲啲有機會撞見,同埋提醒我哋有啲地方治安麻麻唔好去,仲有同我哋嘅小朋友玩下咁。就係咁……計劃咗咁耐嘅踏入英國第一步 – Gotcha! LOTR x4!

    註: 我哋一家係1本BNO拖3本特區護照。

    後記: 其實有幾樣可以改善嘅地方或者幫助到唔駛搞咁耐:

    1. 我哋啲文件係入好喺文件夾仲要逐張攝入膠袋嗰啲,所以人哋拎出嚟影印時可能因為咁要特別長嘅時間。

    2. 帶住小朋友其實我哋都見到有家庭係可以跳過條隊直接埋counter,但因為始終我哋一個過到去都要等埋另外兩個,所以都唔駛咁趕,但如果淨係自己一家過去又有小朋友嘅,不妨問下啲行行企企嘅西裝友職員。

    3. 最後,當然係貫徹香港人一馬當先嘅精神衝去排隊頭,咁就唔駛等咁耐啦。

    歡迎轉載或Share,請註明出處,如果覺得有用請Like & Comment,有問題亦歡迎inbox發問,但因為太陽出嚟嘅時間好多時要湊細路兼初到埗都好多嘢要做,如果覆得慢請見諒。

    https://humgagouk.com/2020/10/09/example-post-2/


Log in to reply