幫阿仔搵學校搵到去蘇格蘭



  • 幫阿仔搵學校搵到去蘇格蘭

    如果淨係講成績嘅可以唔使睇
    係幫人賣廣告
    啱啱上一個月一個post發現大家原來都好想搵啲有啲質素嘅英國私校比小朋友,今日同大家講呢一間寄宿學校。
    首先唔該大家睇吓啲相先
    -越野單車
    -騎馬
    -湖上泛舟
    -玩繩網陣
    -打哥爾夫球
    -玩激流
    -燒真槍 ( .22 rifle shooting)
    -滑雪
    -行山
    -去溪流到學習點解三文魚要逆流而上
    呢個當然唔係歐洲旅行景點,其實係一間位於蘇格蘭嘅私校嘅學生活動。
    上年幫阿仔搵學校嗰陣時其實去過呢間學校睇,Ardvreck School 位於愛丁堡西北面大約個半鐘頭車程。坐落喺小鎮 Crieff 半山之上,雖然行出去大路只係幾分鐘嘅路程,但係感覺好似係個森林入邊嘅一間學校,望住對面座山嘅景色如同國家地理雜誌啲相。
    身為家長最擔心就係小朋友可唔可以喺度開心返學同埋得到照顧,嗰啲硬件其實間間差唔多,分別就係軟件上面,呢個亦係點解要特登揸車上嚟睇嘅原因!!!!!。學校當時特別為我安排兩位小學生帶我周圍睇,其他學校通常都係校長或者老師做嘅。兩個小學生人仔細細,但係已經好獨立,對答有文有路。
    經過每一個班級班房嘅時候,每一個老師都會知道大家哋嘅名,知佢哋讀邊一班,知道佢哋住邊一個Hall。呢度嘅老師仲會喺週末同佢地一齊出去唔同嘅地方玩,行山/越野單車/滑雪,都係基本活動。
    有一樣野同香港好唔同,原來其中一個小學生係下晝有個朗誦比賽,係佢帶我遊覽間學校嘅時候我完全感覺唔到佢有任何緊張。佢一上到個台演繹嘅時候真係變咗第二個人,我估佢嗰日贏嘅機會都好高。
    對於一間寄宿學校來講,小朋友住宿嘅地方都好緊要,雖然都係一間大房擺幾個小朋友,一人一張床,年紀大嗰啲就會多張寫字枱多啲私人空間。我一入到去睇就話"吓咁都得?" 因為其中一張床對上嘅天花板全部都係相。學校就話係呢方面其實彈性好大,始終小朋友離開家長一定會 Home Sick,我就見到每一張床都好個人化,小朋友係已經將學校呢一張床變咗屋企張床一樣。
    你哋咪成日話英國啲嘢好難食,我10分同意。我好好彩可以留低喺佢哋度試食佢哋個午餐,佢哋啲學生同埋老師會幫手喺飯堂嗰度分飯食,你幻想Harry Potter套戲裏面飯堂嗰張長枱,老師同埋同學一齊幫手開飯,個場面真係好震撼。學校通常都會有住校廚師,我諗佢哋都好花時間去搵呢個廚師,真係好好食,尤其是係佢哋個甜品。
    其實睇到一半我自己都心動想自己嚟讀書,無奈超齡得太多啦。
    睇得到最後嘅朋友,如果你哋有其他問題歡迎問我,下面亦會有學校嘅連結可以慢慢了解。
    佢哋因為遠離城市,未係太過受疫情嘅影響,當然如果想申請入學嘅話就要自我隔離咗先,冇問題先返學啦。
    如果有興趣將小朋友安排嚟呢間 Ardvreck School 讀書嘅父母留意,如果你哋係聯絡學校嘅時候同佢哋講係經過呢個 Blog 轉載申請嘅話,可以免左 £150申請費,電郵記得註明 #prefercountryside,但申請表還是要自己填。特別安排機會有限,用完即止,細節唔該問返學校。
    我暫時為大家做到嘅係咁多。
    有機會再介紹其他學校比你哋知,唔使睇來睇去都係排名十大,唔係個個讀書都要咁勁,但係每個小朋友都應該享有開心讀書嘅經驗。
    佢哋嘅官網係呢度
    https://www.ardvreckschool.co.uk/
    學費詳情 Download 佢哋張收費表睇
    https://rrge1n5km5-flywheel.netdna-ssl.com/.../School...
    特別鳴謝 Ardvreck School 俾我轉載佢哋 Facebook 上面嘅相同埋資料。
    @ArdvreckSchool
    #ArdvreckSchool
    #prefercountryside
    英國升學
    英國私立學校
    英國幼稚園
    英國小學
    英國寄宿學校

    https://www.facebook.com/Prefercountryside/posts/1283396112016796


Log in to reply