英國 GP 睇醫生 NHS 急症服務



  • 香港睇醫生好簡單,行入去診所登記搞掂咁英國呢?! 如果病咗咁點算 ? 你知道點算未? 以下係基本睇醫生同埋急診服務。

    先講一般門診(GP)服務

    注意你只可以去你有登記嘅診所,而必須預約時間見醫生,因為一般都唔會當日有期,所以傷風感冒係冇人會去睇,排得嚟都好返。而如果你真係想當日睇到醫生,可以嘗試GP開門前就去排隊,問佢有冇可能俾你攝期。但疫情期間所有GP都冇開,只可以網上或電話證症,有需要先會叫你去門診檢查。

    如果你有領取長期藥物要 Repeat prescription。先要預約醫生登記所有病歷有需要會再做檢查,記得帶埋香港用緊藥物去,亦建議預備三個月至半年所需藥物。醫生開好藥方之後,下次只要你有記錄就可以直接領取下一期藥物。唔同GP有唔同做法,有啲會係接侍處填紙寫好交俾護士,然後過幾日去指定藥房拎藥又或者佢會俾張prescription你去任何藥房領藥。而家有大多GP都可以上網登記。而Co Op都出咗送藥服務。

    NHS 急症服務

    係屋企半夜唔舒服冇GP,求助電話係 1 1 1 。 7 x 24 小時隨時有人接聽。 電話接通後會問你基本資料名、出生日期、地址,然後會登記你基本情況。之後佢哋會refer 你去所屬區域嘅醫院由該醫院再聯絡你。

    等佢哋打返俾你,又會再登記一次你嘅資料再問診。然後決定你有冇需要去醫院,有冇需要救護車。定係其實你只係需要去GP登記。

    而NHS 111 服務包括:

    幫你聯絡你所屬地區醫院
    聯繫護士、牙醫、藥房及GP
    如果有需要會安排面對面診症
    話你知可以食咩藥
    提供照顧自己嘅建議
    以上都係阿媽係女人嘅野試過一次就會識。最難應該係當你病到五顏六色仲要面對英文電話溝通,有冇能力去形容自己病況,有冇能力去聽印度人嘅口音。記得有次病到死去活來聽到電話叫我等佢地打返俾我個人真係好崩潰。果次好好彩佢打返俾我都叫我即刻去醫院。

    注意: GP有翻譯服務,登記時需要註明。 本人冇試過唔知道詳情係點,但有需要係可以要求。

    疫情期間,所有電話第一句會問你有冇COVID-19病徵,有就收線留係屋企唔好搞咁多嘢喇。

    source
    https://www.england01.co.uk/2020/10/09/gp-nhs-do-you-know-how-to-see-doctor/


Log in to reply